Com.presse : Auvergnat Cola
24 août 2009 - Espace presse
Un prat al cap d’un camin bordat de paretonas. Un aubre de las brancas acorchadas per de tèstas banudas. Lo sovenir de la dalha estiflant per las èrbas nautas. La sinfonia ensordenta dels grelhs. Lo fremiment dels fulhatges vibrant de clorofilla. Lo bronzinadís d’una abelha pintada de nectar. Lo bresilhadís a pena perceptible d’un rivatèl qu’òm devina qu’amaisa las raices assedadas.
Moment d’eternitat pendolat dins lo caumaci d’un estiu cantalés. Dins un primièr matin del monde, los fums s’escartan per acompanhar los caminaires, sac sus l’esquina, dins una pojada lenta cap al bonur, pels penjals dels volcans.
Al còr dels vilatges e dels borgs, las terrassas dels cafès desplegan lors para-solelh multicolòrs per apasimar las ardors solaras.
Refrescadas per las aigas reviscolantas d’un torrent que davala de la Planesa o alongada amb de glaçons, la pichona botelha « d’Auvergnat Cola », fièra de son milion de sorretas, contunha de contar l’istòria siá d’un país ont los tripons, la trufada, lo cantal e las lentilhas son l’emblèma del sieu terrador de naissença.
Mas coma totes los enfants que fòranisan, a pas trantalhat per partir sosténer los grops de ròck clarmonteses, « Place de l’Hôtel de Ville » a París.
Brandissent cranament son estendard auvernhat, bailejada per la « Coopérative de Mai », a benlèu contribuït a far de Clarmont d’Auvèrnhe la ciutat mai ròck de França ?!!
Pour la traduction en français :
1ère solution : enrichir votre culture par 10 heures de cours d’Occitan par semaine.
2e solution : venir en courant, à roulotte, à cheval, à cloche pied… pour vous imprégner de la culture auvergnate.
3e solution : phoebus.com@free.fr – Michel Jouinot – 06 80 22 39 50
